ህንፀት ግድብ : ህንፀት ግድብ ህዳሰ ኢትዮጵያ ብዘይ ምንም ምዝንጋዕ ይሳለጥ ኣሎ-ሓይሊ ኤሌክትሪክ ኢትዮጵያ

ህንፀት ዓብዪ ግድብ ህዳሰ ኢትዮጵያ ብዘይ ምንም ምዝንጋዕ ይሳለጥ ከምዘሎ ሓይሊ ኤሌክትሪክ ኢትዮጵያ ኣፍሊጡ።

ሃንደበታዊ ሞት ዋና ኣካያዲ ስራሕ ዓብዪ ግድብ ህዳሰ ኢተዮጵያ ኢንጅነር ስመኘው በቀለ ስዒቡ፥ “ህንፀት እቲ ግድብ ደው ክብል ይኽእል’ዩ” ዝብሉ ወረታት ምንፋሶም ኣብ ሕብረተሰብ ምጥርጣር ከምዝፈጠረ ተገሊፁ።

ይኹን እምበር እቲ ህንፀት ይቕፅል ከምዘሎ ዋና ኣፈፃሚት ስራሕ ሓይሊ ኤሌክትሪክ ኢትዮጵያ ኢንጅነር ኣዜብ ኣስናቀ ንፋና ብሮድ ካስቲንግ ኮርፖሬት ገሊፀን።

“ግድብ ህዳሰ ኢትዮጵያ ናይ ህዝቢ ኢትዮጵያ ኢዩ” ዝበላ ኢንጅነር ኣዜብ፥ ኩሉ ሰብ ብህልኽ ተለዓዒሉ ይሰርሕ ምህላዉ ኣብሪሀን።

ስለዝኾነ ካብ ዝናፈስ ዘሎ መሰረት ኣልባ ወረ ብምርሓቕ ነቲ ግድብ ዝገብሮ ዝነበረ ድጋፍ ኣጠናኺሩ ንክቕፅል ፃውዒተን ኣቕሪበን።

ነቲ ግድብ ብግዝያውነት ንክመርሑ ምኽትል ኢንጅነር ስመኘው ዝነበሩ ኣይተ ኤፍሬም ወልደ ኪዳን ከምዝተመደቡ ድማ ገሊፀን።

ብኣሸብር ካሳሁን