ለመምህራን የሚሰጡ ልዩ ልዩ ጥቅሞች ይፋ ሆኑ

ዛሬ በአፍሪካ ህብረት በተካሄደው የሽልማት ስነ ስርአት ላይ፥ በአዲስ አበባ ከተማ አስተዳደር በመንግስት ትምህርት ቤቶች ለሚያስተምሩ 128 መምህራን፣ ተቆጣጣሪዎችና ርዕሳነ መምህራን ዕውቅናና የገንዘብ ሽልማት ተበርክቶላቸዋል።

በዚህ የሽልማትና ዕውቅና ፕሮግራም ላይ የተገኙት ምክትል ጠቅላይ ሚኒስትር ደመቀ መኮንን፥ መንግስት አቅሙ በፈቀደ መጠን ለመምህራን አስፈላጊውን ጥቅማ ጥቅም እንደሚያሟላ ተናግረዋል።

የዛሬው ሽልማትም የስራ ተነሳሽነት በማሳደግ አቅማቸው ከፍ እንዲያደርጉ ከፍተኛ ሚና አለው ብለዋል።

መንግስት ለመምህራን የሚተገብራቸው ማሻሻያዎች ይፋ ያደረጉት የኢፌዴሪ የትምህርት ሚኒስትር አቶ ሽፈራው ሽጉጤ በበኩላቸው፥ መምህራን እስከዛሬ ሲያነሱ የነበሩትን ቅሬታን የፈታ ጥያቄ ተመልሷል ነው ያሉት።

በሃገሪቱ የመምህራንን ተጠቃሚነት በማሳደግ የትምህርት ጥራትን አሁን ካለበት ከፍ ወዳለ ደረጃ ያሸጋግራል ብሎ መንግስት እየተገበራቸው እና የሚተገብራቸውን ማሻሻያዎችንም ይፋ አድርገዋል።

ሚኒስትሩ እንደገለፁት፥ ቀደም ሲል ከሁለት እርከን ይጀምር የነበረው የመምህራን ደሞዝ ከሀምሌ 1 ቀን 2008 ዓመተ ምህረት ጀምሮ በ10 እርከን የሚጀመር ይሆናል።

የእስከዛሬው የመምህራን ደሞዝ ጣሪያ፥ አንድ መምህር በዜሮ አመት የስራ ልምድ ሲቀጠር ከመጀመሪያ ዲግሪ የመነሻ ደሞዝ በሁለት እርከን ከፍ ያለ ነበር።

አሁን በተደረገው ማሻሻያ መሰረት የጀማሪ መምህራን ደሞዝ ከዚህ በፊት ከነበረው የመንግስት የመነሻ ደሞዝ፥ አጠቃላይ በ10 እርከን ከፍ እንዲል ተደርጓል።

ከዚህ በተጨማሪም በስራ አፈጻጸማቸው መምህራን ያገኙት የነበረው የእርከን እድገትም እንዲሻሻል ተደርጓል።

በዚህም መሰረት ከዚህ ቀደም አንድ መምህር በስራ ውጤታማነቱ ከ1 በላይ እርከን ማግኘት አይችልም ነበር።

አሁን የተደረገው ማሻሻያ ግን እንደ ስራ አፈጻጸሙ አንድ መምህር/ት በአንድ ጊዜ እስከ ሶስት እርከን ማደግ የሚችሉበትን አግባብ ይተገብራል።

ከደሞዝ ማሻሻያው በተጨማሪ በአዲስ አበባ ለሚገኙ መምህራን 5 ሺህ የመኖሪያ ቤቶች መገንባታቸውን አንስተዋል።

ሌሎች 19 ሺህ የመኖሪያ ቤቶችም ለአዲስ አበባ መምህራን በመገንባት ላይ መሆናቸውንም ነው የጠቆሙት።

በሌሎች አካባቢዎች እና በተለይም በገጠር አካባቢዎች የሚያስተምሩ መምህራን ደግሞ የመኖሪያ ቤት መስሪያ መሬት በቀላሉ እንዲያገኙ እንደሚደረግ ወይም ቤት ተገንብቶ እንዲሰጣቸው ይደረጋል ብለዋል።

በስራ አፈጻጸማቸው ውጤታማ ለሆኑት መምህራን ሽልማት መበርከቱ ለቀጣይ ትውልድን የማነጽ ስራ ትልቅ አቅም እንደሚሆን የገለጸው ደግሞ የአዲስ አበባ ትምህርት ቢሮ ነው።

ሽልማቱ እንዳስደሰታቸው የገለጹት ተሸላሚ መምህራን በቀጣይ ከዚህ የተሻለ እንደሚሰሩ ቃል ገብተዋል።

“ክብርና ምስጋና ለህዳሴው ትውልድ አናጺ መምህራን” በሚል መሪ ቃል ነው የሽልማት ስነ ስርዓቱ የተካሄደው።

FBC