ከታንዛንያ 74 ኢትዮጵያውያን ስደተኞች ወደ አገራቸው ተመለሱ

ሰኔ 08፣2008

በታንዛንያ በስደት ላይ የነበሩ 74 ኢትዮጵያውያን ወደ አገራቸው ተመለሱ።

የዓለም አቀፉ የስደተኞች ድርጅት ባደረገው ድጋፍ ወደ አገራቸው የገቡት እነዚህ ስደተኞች በሕገ-ወጥ መንገድ ወደ ደቡብ አፍሪካ ለመግባት ሲሞክሩ በታንዛንያ ፖሊስ ተይዘው በእሥር ቤት ለወራት የቆዩ ናቸው።

ከተመለሱት 74 ስደተኞች ውስጥ 53ቱ እድሜያቸው ከ18 ዓመት በላይ ሲሆኑ፣ ቀሪዎቹ ከ18 ዓመት በታች ናቸው ።

የኢትዮጵያና ታንዛንያ መንግሥታትን ጨምሮ በዓለም አቀፍ የስደተኞች ድርጅት አጋዥነት ወደ አገራቸው መመለሳቸውን የገለጹት ስደተኞቹ በህገ ወጥ አዘዋዋሪዎች ምክንያት የደረሱበት የማይታወቅ፣የሞቱና ሌሎች ለእንግልት የተዳረጉ ስደተኞች መኖራቸውን ገልጸዋል።

በያዝነው ዓመት በዓለም አቀፉ የስደተኞች ድርጅት ትብብር 1 ሺህ 657 ስደተኞች ከ10 አገሮች ወደ አገራቸው መመለሳቸውን በኢትዮጵያ የዓለም አቀፍ ስደተኞች ድርጅት ጽሕፈት ቤት ማስታወቁን የኢዜአ ዘገባ ያመለክታል።