የቀድሞ የገላን ከተማ ከንቲባን ጨምሮ የስራ ሀላፊ የነበሩ 12 ግለሰቦች በሙስና ወንጀል ተጠርጥረው በቁጥጥር ስር ዋሉ

የኦሮሚያ ክልል ስነ ምግባርና ጸረ ሙስና ኮሚሽን ኮሚሽነር ታከለ አንኮሳ ለፋና ብሮድካስቲንግ ኮርፖሬት እንደገለጹት፥ የቀድሞ የከተማዋ ከንቲባ አቶ ሙሉጌታ ከበደ እና የከተማዋ የኢንቨስትመንት ጽህፈት ቤት ሀላፊ፣ የመሬት ልማት ማኔጅመንት ጽህፈት ቤት ሀላፊ፤ የከተማዋ ካቢኔና ሌሎችም በሀላፊነትና በባለሙያነት ሲሰሩ የነበሩ ግለሰቦች በቁጥጥር ስር ውለዋል።

ኮሚሽኑ በእነዚህ ግለሰቦች ላይ ከወራት በፊት ምርመራ ሲያደርግ እንደቆየና በስራ ሀላፊነታቸው ወቅት ከኢንቨስትመንት ፈቃድ አሰጣጥ ጋር ተያይዞ፣ በባቡር መንገድ ግንባታ ምክንያት ለተፈናቀሉ አርሶ አደሮች የሚገባውን የካሳ ክፍያ አለመክፈልና ለራስ መጠቀም፣ ተተኪ ቦታዎችን ለማይገባው ግለሰብ መስጠት፣ የቀድሞ ይዞታ ያልነበራቸውን ሰዎች እንደነበራቸው ማድረግና መሰል ወንጀሎችን ፈጽመዋል በሚል በሙስና መጠርጠራቸው ተጠቁሟል።

ከዚህ በተጨማሪ በከተማዋ በተለያዩ ጊዜ ይሰሩ የነበሩትን የከተማዋ ፕሮጀክቶች የመንግስትን መመሪያ ደንብና የፋይናንስ ህጉን ባልተከተለና ጥራቱን ባልጠበቀ መንገድ እንዲሰራ በማድረግ ከጥቅሙ መጋራት የሚለው ሌላኛ ካስጠረጠራቸው ወንጀል ውስጥ ይገኛል።

ኮሚሽኑ እነዚህን የምርመራ ውጤቶች መነሻ በማድረግ ነው ዛሬ በቁጥጥር ስር ያዋልኳቸው ብሏል።

በግለሰቦቹ ላይ የሚደረገው ምርመራ አሁንም የቀጠለ ሲሆን፥ ባለው መረጃ መሰረት በነገው እለት ፍርድ ቤት የሚቀርቡ ይሆናል።

ግለሰቦቹ የተጠረጠሩበት የሙስና ወንጀልን ጨምሮ በሌሎችም የሙስና ተግባራት ላይ ተሳትፈዋል ተብለው የሚጠረጠሩ ግለሰቦችንም ለሚያዝ ክትትል እየተደረገ ነው ተብሏል።