በ11ኛው ዙር እጣ ያልወጣባቸው የ10/90 ቤቶች ለልማት ተነሺዎች ሊከራዩ ነው

በ10/90 የቤቶች ፕሮግራም ቁጠባቸውን ካቋረጡት ተመዝጋቢዎች ውጪ ለሁሉም ተደራሽ መሆናቸውን የአዲስ አበባ ቤቶች አስተዳደር ኤጀንሲ ስራ አስኪያጅ አቶ ሽመልስ ታምራት ተናግረዋል።

ከተማ አስተዳደሩ ከዚህ ቀደም የልማት ተነሽዎች እንደፍላጎታቸው የጋራ መኖሪያ ቤቶች አልያም የቀበሌ ቤቶችን እንዲመርጡ ይደረግ እንደነበር ያስታወሱት ስራ አስኪያጁ፥ አሁን ግን ኮንዶሚኒየም መግባት ለፈለጉና የመክፈል አቅም ለሌላቸው ተነሺዎች በተመጣጣኝ ዋጋ ቤቶቹ በኪራይ መልክ ይተላለፋሉ ብለዋል።

ኤጀንሲው ለመጀመሪያ ጊዜ በጋራ መኖሪያ ቤቶች ቅድሚያ የተሰጣቸውን አካል ጉዳተኞች ጨምሮ ለሴቶችና ለመንግስት ሰራተኞች በተሰጠው እድል 18 ሺህ 735 የቤት ተመዝጋቢዎች ተጠቃሚ መሆናቸውንም አመላክቷል።

በ10/90 የቤቶች ፕሮግራም 12 ሺህ 784 ነዋሪዎች በልዩ ሁኔታ እድሉን ሲያገኙ በ20/80 ፕሮግራም ደግሞ 5 ሺህ 951 ቤት ፈላጊዎች ቅድሚያ ተሰጥቷቸዋል፡፡

በዚህም ከ14 ሺህ በላይ ሴቶች፣ ከ700 በላይ አካል ጉዳተኞችና ከ3 ሺህ በላይ የመንግስት ሰራተኞች ተጠቃሚ መሆናቸውን ነው ኤጀንሲው ያስታወቀው።

ባሳለፍነው ሐምሌ 30 በወጣው 11ኛው ዙር የጋራ መኖሪያ ቤቶች እጣ ከ39 ሺህ በላይ ቤቶች ዕጣ መውጣቱ የሚታወስ ነው፡፡

በዕጣው ለሴቶች 30 በመቶ፣ ለመንግስት ሰራተኞች 20 በመቶ፤ ለአካል ጉዳተኞች ደግሞ 5 በመቶ ቅድሚያ ተሰጥቷል።