አሜሪካ ለኢትዮጵያ ተጨማሪ የ35 ሚሊየን ዶላር የሰብዓዊ ድጋፍ አደረገች

የአሜሪካ መንግስት ይፋ ያደረገው የሰብዓዊ እርዳታ በድርቁ ምክንያት የሰብዓዊ እርዳታ ለሚያስፈልጋቸው ሰዎች ድጋፍ እያቀረቡ በሚገኙት የተባበሩት መንግስታት ድርጅት እና በተለያዩ ግብረ ሰናይ ድርጅቶች በኩል የሚደርስ ይሆናል።

ድጋፉ 6 ሺህ ሜትሪክ ቶን አልሚ ምግብን ያካተተ ሲሆን፥ በደርቁ ምክንያት ለተመጣጠነ ምግብ እጥረት ለተጋለጡ ዜጎች ይከፋፈላልም ነው ያለው የአሜሪካ ኤምባሲ ለፋና ብሮድካስቲንግ ኮርፖሬት በላከው መግለጫ።

የዩ ኤስ አይድ የኢትዮጵያ ዳይሬክተር ሌስሊ ሬድ፥ የዩናይትድ ስቴትስ መንግስት በድርቁ ምክንያት የተጎዱ ኢትዮጵያውያን ይህን አስቸጋሪ ጊዜ እንዲያልፉ ከጎናቸው መሆኑን አረጋግጠዋል።

ዩ ኤስ አይድ በድርቅ በተጎዱ አከባቢዎች ዘር በማቅረብ እና ገበሬዎች ከብቶቻቸውን እና ሌሎች ንብረቶቻቸውን እንዳይሸጡ እና ድርቁን ተቋቁመው በሁለት እግራቸው እንዲቆሙ የበኩሉን ድጋፍ እያደረገ መሆኑን ነው የገለፀው።

የዩናይትድ ስቴትስ መንግስት ከፈረንጆቹ 2015 ጀምሮ ለኢትዮጵያ በአጠቃላይ የ774 ሚሊየን የአሜሪካ ዶላር ድጋፍ አድርጓል።