በወሰን ማካለል የተነሱ ችግሮችን ለመፍታት ክልሉ ቁርጠኛና ዝግጁ ነው—ርእሰ መስተዳድር አቶ ገዱ አንዳርጋቸው

ርዕሰ መስተዳድሩ ዛሬ ለጋዜጠኞች በሰጡት መግለጫ እንዳመለከቱት በሁለቱ ክልሎች መካከል የወሰን ጥያቄ ከተነሳ ረጅም ዓመታት ቢያስቆጥርም በተለያዩ ምክንያቶች እየተጓተተ ሳይፈታ መቆየቱን ገልጸልዋል።

ሳይፈታ በመቆየቱም ጭቅጭቅና ወደ ግጭት ሊያመሩ የሚችሉ ችግሮች እንዲፈጠሩ ማድረጉን ጠቁመው ችግሩን በፍጥነት ለመፍታት ሁለቱ ክልሎች የጋራ መግባባት ላይ መደረሳቸውን ገልጸዋል፡፡

ክልሉ ይህን ችግር ለመፍታት ቁርጠኛና ዝግጁ መሆኑን ያስታወቁት አቶ ገዱ ” እልባት በመስጠት ወደ ሌሎች አንገብጋቢ ወደሆኑ የክልሉን ዘላቂ ልማት በሚያፋጥኑ ጉዳዮች ላይ ማተኮር ያስፈልጋል “ብለዋል፡፡

ህብረተሰቡም በዚህ ረገድ ከክልሉ መንግስት ጋር በጋራ በመምከርና ገንቢ ሃሳቦችን በመስጠት ለችግሩ ለአንዴና ለመጨረሻ ጊዜ እልባት ለመስጠት ተሳትፎውን ማጠናከር እንዳለበትም አሳስበዋል፡፡

“በጎንደር ከተማ ከተለያዩ የህብረተሰብ ተወካዮች ጋር የተካሄደው የጋራ ውይይት ህብረተሰቡ በግልጸኝነት ስሜቱን የገለጸበት መድረክ ነበር “ብለዋል፡፡

መድረኩ በችግሮች ላይ በዝርዝር መግባባት እንዲፈጠር ማድረጉንና ህብረተሰቡም የአካባቢውንም ሆነ የሀገሪቱን ተጨባጭ ሁኔታ እንዲገነዘብ ማገዙን ተናግረዋል፡፡

“ህብረተሰቡ የከተማውም ሆነ የክልሉ ሰላም እንዲጠበቅ ሃላፊነቱን ለመወጣት ቃል የገባበት መድረክ ነበር “ብለዋል፡፡

አመራሩ ህብረተሰቡ ችግሮች ያላቸውን ጉዳዮች ፈጥኖ ለማስተካከል ውሎ ሳያድር ወደ ተግባራዊ እንቅስቀቃሴ የገባበት ሁኔታ መኖሩንና ቀጣይ መድረኮችንም እስከ ታችኛው አካል ድረስ ለማውረድ ዝግጅት መደረጉን አቶ ገዱ አስታውቀዋል
የኢትዮጵያ ዜና አገልግሎት