ብአዴን እያካሄደ ያለው ጥልቅ የተሀድሶ ግምገማ የሕዝቡን ጥያቄዎች ለመመለስ አቅም የሚፈጥር መሆኑ ተገለጸ

የፅህፈት ቤቱ ኃላፊ አቶ አለምነው መኮንን እንዳሉት ብአዴን በሕዝብ ተወልዶ በሕዝብ ድጋፍ ያደገ ድርጅት ነው።

በብዝሃነት የተገነባውን ዴሞክራሲያዊ አንድነቱን እንደጠበቀ፣ ህዝባዊ ወገንተኝነቱንና የዓላማ ፅናቱን እንደተላበሰ ባለፉት ዓመታት ድሎችን ሲያስመዘግብ የቆየ ድርጅት መሆኑንም ገልፀዋል።

ድርጅቱ በተለያዩ ጊዜያት የገጠሙትን ፈተናዎች በሰከነ አካሄድ በመገምገምና ራሱን በራሱ በማስተካከል በክልሉም ሆነ በሀገሪቱ ለተመዘገበው ሁለንተናዊ እድገት የጎላ ሚና ማበርከቱንም አቶ አለምነው አስረድተዋል።

ይሁንና ባለፉት ጥቂት ጊዜያት በአመራሩ የቁርጠኝነት ማነስ፣ ስልጣንን ለግል ጥቅም ማዋል፣ የሥራ እጥነት ችግር፣ ሙስናና የኪራይ ሰብሳቢነት አመለካከትና ተግባር እየገነነ መምጣቱ በሕዝብ ላይ ቅሬታ እየፈጠረ መምጣቱን ተናግረዋል።

የጥፍት ኃይሎችም የሕዝቡን ጥያቄ መነሻ በማድረግ በቀሰቀሱት ሁከትና ብጥብጥ የሰው ሕይወት መጥፋቱንና በብዙ ልፋትና ድካም በክልሉ ወደኢንቨስትመንት ሥራ የገቡ ተቋማት መውደማቸውን ገልጸዋል።

በተጨማሪም በሌሎች የግልና የመንግስት ንብረቶች ላይ ጉዳት መድረሱን ነው የገለጹት።

በሕዝቡ ላይ የተፈጠረውን ቁጣና ተቃውሞ ለማስተካከል ድርጅቱ ራሱን ማየት አስፈላጊና ወሳኝ ሆኖ መገኘቱን ተናግረዋል።

“በዚህም አመራሩ በጥልቀት ተገምግሞ ማስተካከያ ለማድረግ ርብርብ በመደረግ ላይ ነው” ብለዋል።

በተሀድሶ ግምገማው ለችግሮቹ መፈጠርና በወቅቱ መፍትሄ አለመስጠት አመራሩ ራሱን ተጠያቂ ያደረገ ሲሆን በመድረኩ ላይ የችግሩ መንስኤ ከነመፍትሄው እየተቀመጠ መሆኑን አብራርተዋል።

ከግምገማው በኋላ ድርጅቱን መልሶ ለማደራጀት ሰዎችን የመለየት ሥራ እየተከናወነ እንደሚገኝ አቶ አለምነው አመልክተዋል።

በአሁኑ ወቅት በ14 መድረኮች ከ7 ሺህ በላይ ከፍተኛና መካከለኛ አመራሮች የተሳተፉበት የጥልቅ ተሃድሶ ግምገማ በመካሄድ ላይ መሆኑን ገልጸዋል።

በቀጣይም ግምገማውን እስከታች ድረስ በማውረድ ከ1 ነጥብ 6 ሚሊየን በላይ የሚሆኑ የድርጅቱ አባሎች ውይይት እንደሚያደርጉ አስታውቀዋል።

ሕብረተሰቡና የመንግስት ሠራተኛውም ውይይት እንደሚደረግ ነው የጠቆሙት።

ጥልቅ የተሀድሶ ግምገማው ድርጅቱ ያሉበትን ችግሮች በመፈተሽና በማስተካከል የገጠመውን ፈተና በብቃት ለመወጣት አቅም ይፈጥርለታል ያሉት ሀላፊው፥ ብአዴን መስመሩን በማጥራት የሕዝብ ጥቅም ለማስከበር የሚያደርገው ትግል ለፍሬ እንዲበቃ ሕዝቡ የበኩሉን ሚና ሊወጣ እንደሚገባም አሳስበዋል።

ምንጭ፦ ኢዜአ