ኢትዮጵያና ቻይና በአካባቢ ሠላምና መረጋጋት በጋራ ይሰራሉ – ፕሬዚዳንት ሙላቱ

ፕሬዝዳንቱ በቻይና ማዕከላዊ የሚሊቴሪ ኮሚሽን ምክትል ኃላፊ ጄኔራል ፋን ቻንግሎንግ የተመራውን የልዑካን ቡድን በጽህፈት ቤታቸው አነጋግረዋል።

በቆይታቸውም የሁለቱ አገራት ስትራቴጂክ ግንኙነት በሁሉም ዘርፍ በሚጠናከርበት ሁኔታ መክረዋል።

ፕሬዝዳንት ሙላቱ የሀገራቱ ግንኙነት ከመሪዎች ባለፈ በህዝብ ለህዝብ እና በቢዝነስ ለቢዝነስ የዳበረና ጠንካራ መሆኑን ለልዑካን ቡድኑ ገልጸዋል።

አገሪቷ ለያዘችው የልማት አቅጣጫም የቻይና የልማት አጋርነት የጎላ ሚና እየተጫወተ መሆኑን ተናግረዋል።

ይህ መልካም ወዳጅነት ይበልጥ እንዲጠናከር በቀጣይ በአካባቢ ሠላምና መረጋጋት ዙሪያም በጋራ እንሰራለን ብለዋል።

ኢትዮጵያና ቻይና በአካባቢ ሠላም ዙሪያ በጋራ መስራታቸው ኢኮኖሚያዊ ግንኙነታቸውን ጠንካራና ደህንነቱ የተጠበቀ እንዲሆን ያስችለዋል ያሉት ደግሞ ጄኔራል ፋን ቻንግሎንግ ናቸው።

ይህን እውን ለማድረግና ግንኙነታቸው ይበልጥ እንዲጠናከር አገራቸው የበኩሏን እንደምትወጣም ነው የገለጹት።

ጀኔራሉ በቆይታቸው ከመከላከያ ሚኒስትርና ከሌሎች የስራ ኃላፊዎች ጋር እንደሚወያዩም ይጠበቃል።

ምንጭ፦ ኢዜአ