ኮሚሽኑ በድርቅ ለተጎዱ አካባቢዎች አስቸኳይ የሰብዓዊ ድጋፍ እያደረገ ነው

ኮሚሽኑ በድርቅ በተጎዱ አካባቢዎች ለእንስሳት መኖ እያቀረበ መሆኑንም ገልጿል።

ኮሚሽነሩ አቶ ምትኩ ካሳ ለኢዜአ እንደገለጹት፥ 5 ነጥብ 6 ሚሊየን ለድርቅ ተጋላጭ የሆኑ ዜጎችን ለመታደግ መንግሥት ሰብዓዊ ድጋፍ እያቀረበ ነው።

መጪውን ሁለት የበጋ ወራት ግምት ውስጥ በማስገባትም መንግሥት በድርቅ በተጠቁ አካባቢዎች ለሚኖሩ ዜጎች የምግብና የቁሳቁስ ድጋፍ ከወዲሁ ለማድረግ ተዘጋጅቷል ብለዋል።

አሁን የድርቅ አደጋው የሚስተዋለው አርብቶ አደር በሚኖርባቸው የደቡብ ምሥራቅ የሃገሪቱ አካባቢዎች እንደሆነም ኮሚሽነር ምትኩ ተናግረዋል።

ከዓሳና እንስሳት ኃብት ልማት ሚኒስቴርና ከክልል ቢሮዎች የተውጣጣ የእንስሳት ህክምና ቡድንም ድርቅ ባጠቃቸው አካባቢዎች ተሰማርቶ የህክምና አገልግሎት እየሰጠ መሆኑን አስረድተዋል።

በእስካሁኑ ሂደትም 148 ሺህ እስር የእንስሳት መኖ ከፌደራልና ከክልል መንግስታት ለደቡብ ኦሞ ዞን ማድረስ የተቻለ ሲሆን፥ አምስት የንጹህ መጠጥ ውኃ ማጠራቀሚያ ታንከሮችም በመሰራት ላይ እንደሆኑ ጠቁመዋል።

በተመሳሳይ ለኢትዮጵያ ሶማሌ ክልል 50 ሺህ እስር የእንስሳት መኖ እንዲሁም 10 ሺህ ኩንታል አልሚ ምግብ በድርቁ ለተጠቁ ዜጎች ድጋፍ ተደርጓል።