ሼህ ኑሩ ይማምን በሽጉጥ ገድለዋል በሚል የተከሰሰሱት ግለሰቦች ጥፋተኛ ተባሉ

የፌደራል ከፍተኛ ፍርድ ቤት ልደታ ምድብ 19ኛ ወንጀል ችሎት ዛሬ በዋለው ችሎት 13ቱ ተከሳሾች እስላማዊ መንግስት ለመመስረት እና አላማቸውን የማይደግፍ አካላት ላይ የሃይል እርምጃ ለመወሰድ ሲቀሳቀሱ ነበር ተብለው በተመሰረተባቸው የሽብር ወንጀል ክስ ጥፋተኛ ናቸው ሲል ብይን ሰጥቷል።

ጥፋተኛ የተባሉት ተከሳሾች 1ኛ አህመድ እንድሪስ፣ 2ኛ አንዋር ኡመር፣ 3ኛ ሷሊህ መሃመድ፣ 4ኛ አደም አረጋውያን ጨምሮ አስራ ሶስት ተከሳሾች ናቸው።

የአቃቤ ህግ ክስ እንደሚያመላክተው ተከሳሾቹ ከ2004 ዓ.ም ጀምሮ አክራሪነትን ለማስፋፋት በመደራጀት እስላማዊ መንግስት ለመመስረት ተቀሳቅሰዋል።

በሰኔ 27 ቀን 2005 ከምሽቱ 2 ስዓት በደሴ ከተማ የሸዋ በር መስጅድ የሃይማኖት አባት የሆኑት ሼህ ኑር ይማምን በሽጉጥ ግንባራቸው ላይ ሁለት ጊዜ በመምታት መግደላቸውም በክሱ ላይ ተመላክቷል።

በተለያዩ ጊዜያትም የእነሱን አላማ የማይደግፉ ግለሰቦች ላይ የሃይል እርምጃ ለመውሰድ ተቀሳቅሰዋል ይላል አቃቤ ህግ በክሱ።

የግራ ቀኙን ክርክር አዳምጦ ተከሳሾቹን ጥፋተኛ ያለው የልደታ ምድብ 19ኛ ወንጀል ችሎት የቅጣት ውሳኔ ለመወሰን ለጥር 9 ቀን 2009 ዓ.ም ተለዋጭ ቀጠሮ ሰጥቷል።