Get real time updates directly on you device, subscribe now.
በምስራቅ ሸዋ ዞን ቦራ ወረዳ 4 ሺህ 300 ሀሰተኛ የብር ኖቶችን ከትክክለኛ የብር ኖቶች ጋር ቀላቅሎ ሲገበያይ የነበረ ግለሰብ በቁጥጥር ስር መዋሉን ፖሊስ አስታወቀ።የምስራቅ ሸዋ ዞን ፖሊስ የህዝብ ግንኙነት ባልደረባ ምክትል ኮማንደር አስቻለው ዓለሙ እንደገለጹት ግለሰቡ ትናንት የተያዘው በሳምንት አንድ ቀን በሚውለው የአለም ጤና ከተማ ገበያ ላይ ነው።ግለሰቡ በቁጥጥር ስር ሊውል የቻለው 4 ሺህ 300 ሀሰተኛ የብር ኖቶችን ከትክክለኛው የብር ኖቶች ጋር በመቀላቀል ብዙ ኩንታል ጤፍ እየሸመተ በነበረበት ወቅት ሕብረተሰቡ ለፖሊስ ባደረሰው ጥቆማ ነው።ግለሰቡ በወቅቱ 41 ባለ መቶና አራት ባለ ሃምሳ ሀሰተኛ የብር ኖቶች ከበርካታ ትክክለኛ የብር ኖቶች ጋር ቀላቅሎ ይዞ ነበር።እንደምክትል ኮማንደር አስቻለው ገለጻ ግለሰቡ በሞጆ ከተማ በንግድ ሥራ የተሰማራ ሲሆን፥ ሀሰተኛ የብር ኖቶቹን ከየትና እንዴት እንዳመጣቸው ለማረጋገጥ በአሁኑ ወቅት ምርመራ እየተካሄደ መሆኑን አመልክተዋል።ወቅቱ ምርት ተሰብስቦ ለገበያ የሚቀርብበት በመሆኑ ሕብረተሰቡ በሀሰተኛ የብር ኖቶች እንዳይጭበረበር ጥንቃቄ እንዲያደርግና ሲያጋጥመውም ለፖሊስ ወዲያው እንዲያሳውቅ አሳስበዋል። ምንጭ፦ ኢዜአ
