በካምፓላ የዓለም አገር አቋራጭ ሻምፒዮና ኢትዮጵያ የመጀመሪያውን ወርቅ አገኘች

በኡጋንዳ ካምፓላ እየተካሄደ ባለው 42ኛው የዓለም አገር አቋራጭ ሻምፒዮና ኢትዮጵያ የመጀመሪያውን ወርቅ  አገኘች።

አትሌት ለተሰንበት ግደይ በሴቶች ከ20 ዓመት በታች ውድድር የመጀመሪያውን ወርቅ ስታስገኝ፤ አትሌት ሀዊ ፈይሳ የብር ሜዳሊያ አምጥታለች፤ ኬንያ የነሐስ ሜዳሊያ ወስዳለች።

በወንዶች ከ20 ዓመት በታች ውድድር ኡጋንዳ ወርቅ፣ ኢትዮጵያ ብር፣ ኬንያ ነሐስ አግኝተዋል፤ አትሌት አምደወርቅ ዋለልኝ ነው ለኢትዮጵያ የብር ሜዳሊያ ያስገኘው።

በድብልቅ የዱላ ቅብብል ውድድርም ኢትዮጵያ የብር፣ ቱርክ የነሐስ ሜዳሊያ ሲያገኙ ኬንያ የወርቅ ሜዳሊያው ባለቤት ሆናለች።

የአዋቂ ሴቶችና ወንዶች ዛሬ የሚጠበቁ ውድድሮች ናቸው።

ኢትዮጵያ 29 አትሌቶችን ጨምሮ 43 የልዑካን ቡድን አባላትን ወደ ካምፓላ መላኳ ይታወቃል።

ውድድሩን በአንደኝነት የሚያጠናቅቁ አትሌቶች 30 ሺህ፣ ሁለተኛ የሚሆኑት 15 ሺህ፣ ሶስተኞቹ ደግሞ የ10 ሺህ ዶላር ሽልማት ይበረከትላቸዋል።

የቡድን አንደኞች 20 ሺህ፣ ሁለተኞች 16 ሺህ እንዲሁም በሶስተኝነት የሚያጠናቅቁ 12 ሺህ ዶላር ያገኛሉ።

ኢትዮጵያ እስካሁን በተሳተፈችባቸው የዓለም አገር አቋራጭ ሻምፒዮናዎች 96 የወርቅ፣ 101 የብርና 58 የነሐስ በድምሩ 255 ሜዳሊያዎችን አስመዝግባለች። ENA