የብአዴን ማዕከላዊ ኮሚቴ መደበኛ ስብሰባውን ጀመረ

የብሄረ አማራ ዴሞክራሲያዊ ንቅናቄ (ብአዴን) ማዕከላዊ ኮሚቴ የግማሽ ዓመት መደበኛ  ስብሰባውን በባህር ዳር ከተማ ማካሄድ ጀምሯል።

መደበኛ ስብሰባው ባለፉት ስድስት ወራት በክልሉ የተከናወኑ ስራዎችና የጥልቅ ተሃድሶ ንቅናቄው ያለበት ደረጃ ይገመገማሉ።

ህብረተሰቡ የሚያነሳቸው የመልካም አስተዳደር፣ የአገልግሎት አሰጣጥ እና ሌሎችንም ችግሮች ከመፍታት አኳያ የተከናወኑ ስራዎች ላይ ኮሚቴው በትኩረት እንደሚወያይባቸው ነው የተነገረው።

በገጠር የህብረተሰቡን ምርታማነት ለማሳደግ የተሰሩ ስራዎች፣ በከተማ የጥቃቅን እና አነስተኛ ተቋማት እና የአምራች ኢንዱስትሪ ዘርፎች እንዲሁም የመካከለኛና ከፍተኛ ኢንዱስቲሪዎች በተለይም የኢንዱስትሪ ፓርክ አፈፃፀሞች በዝርዝር እንደሚገመገሙ ተጠቁሟል።

ድርጅቱ እቅዶችን በስኬት ለመፈፀምና የመሪነቱን ሚና ለመወጣት የሚያግዙ የትኩረት ነጥቦችን እንደሚያስቀምጥም ተገልጿል።

በስብሰባው ላይ የቀድሞ የብአዴን ማዕከላዊ ኮሚቴ አባላት፣ የዞን አስተዳዳሪዎችና የሜትሮፖሊታንት ከተማ ከንቲባዎች ተሳታፊ መሆናቸውን ከማዕከላዊ ኮሚቴው ያገኘነው መረጃ ያስረዳል፡፡ የብአዴን ማዕከላዊ ኮሚቴ መደበኛ ስብሰባ ዛሬን ጨምሮ ለአራት ቀናት ይካሄዳል፡፡