የኦህዴድ 27ተኛ ዓመት የምስረታ በዓል ነገ ይከበራል

የኦሮሞ ሕዝብ ዴሞክራሲያዊ ድርጅት(ኦህዴድ) 27ተኛ ዓመት የምስረታ በዓል በክልል ደረጃ በነገው እለት ይከበራል።

ለኦሮሞ ሕዝብ ተጠቃሚነት በተሃድሶ የገባውን ቃል ተግባራዊ በማድረግ የህዝብ ወገንተኝነቱን እንደሚያረጋግጥ ድርጅቱ አስታውቋል።

የኦህዴድ ማዕከላዊ ኮሚቴ የምስረታ በዓሉን አስመልክቶ ባወጣው መግለጫ፥ ባለፉት ዓመታት በውስጥና በውጭ ያጋጠሙትን እንቅፋቶች ለማስወገድ የትክክለኛ ትግል መስመሩን የህዝብ ማድረግ ላይ አትኩሮ በመስራት ላይ እንደሚገኝ አስታውቋል።

ኦህዴድ የኦሮሞ ሕዝብ ትግል ጋሻ በመሆን ለዘመናት የማይዘነጋ ታሪክ ያስመዘገበ ድርጅት መሆኑንና ራስን በራስ በማስተዳደር ረገድ የልማት፣ የዴሞክራሲ፣ የሰላም እና የኦሮሞ ሕዝብ የሉዓላዊነት ጥያቄዎች ላይ ፅኑ አቋም ያለው መሆኑን በተግባር ያሳየ ነው ብሏል።

ከህዝባችን ጋር ሆነን ያስመዘግብናቸውን ድሎች በልበ ሙሉነት ስንገልፅ ለዘመናት ካሳለፍነው ታሪክ ጋር በማነፃፀር ነው ያለው የድርጅቱ ማዕከላዊ ኮሚቴ፥ ከሁሉም በላይ ህዝባዊ ወገንተኝነቱን እና ዴሞክራሲያዊ ባህሉን ይዞ የህዝቡን ተጠቃሚነት ለማረጋገጥ ተጠናክሮ እንደሚንቀሳቀስ አስታውቋል።

ድርጅቱ የህዝብን ተጠቃሚነት ለማረጋገጥ በሚያደርገው ጥረት የክልሉ ህዝብ፣ የድርጅቱ አባላት እና ደጋፊዎቹ በተለመደው ሁኔታ የሚያደርጉትን ድጋፍ አጠናክረው እንዲቀጥሉ የኦህዴድ ማዕከላዊ ኮሚቴ በመግለጫው ጥሪ አቅርቧል።