የዓባይ ተፋሰስ ሀገራት ግብፅ ወደ ስብስቡ መመለስ በምትችልበት ሁኔታ ላይ ተወያዩ

የዓባይ ተፋሰስ ሀገራት የሚኒስትሮች ምክር ቤት ግብፅ ወደ ናይል ተፋሰስ ኢኒሼቲቭ አባልነቷ ሙሉ ለሙሉ እንድትመለስ በሚያስችል ሁኔታ ላይ ትናንት በኢንቴቤ መክሯል።

ኢኒሼቲቩ ባወጣው መግለጫ ግብጽ ወንዙን በፍትሃዊነት እና እኩልነት ለመጠቀም በተፈረመው የትብብር ስምምነት ማዕቀፍ ላይ ካይሮን በተመለከተ የምክር ቤቱ ልዩ ኮሚቴ የሚወጣቸው ሪፖርቶችን አጥንታ ምላሽ ለመስጠት እንድትችል ተጨማሪ ጊዜ ስትጠይቅ ቆይታለች።

በመግለጫው መሰረት ግብጽ ወደ ሙሉ የኢኒሼቲቩ አባል ሀገርነት ለመመለስ የሚያስችላትን ሁኔታ ለማመቻቸት በኢንቴቤ በተካሄደው ስብሰባ ተሳትፋለች።

የትብብር ስምምነቱ ረቂቅ ላይ ሁሉም አባል ሀገራት የጋራ መስማማት እና ተሳትፎ አለማድረጋቸው በወደፊት የውሳኔ አሰጣጥ ሂደት ላይ ችግር እንደሚፈጥር ነው ካይሮ የጠቀሰችው።

በስምምነት ሰነዱ አንቀፅ 14 ላይ የሰፈረው ሃሳብ የአሁናዊ እና የወደፊት የውሃ አጠቃቀም እና መብቶችን በአግባቡ አልተመለከተውም የሚል ጥያቄንም አንስታለች።

ምክርቤቱ በትናንቱ ስብሰባው ግብጽ ላነሳቻቸው ጥያቄዎች መልስ የሰጠ ሲሆን ግብፅ በበኩሏ ወደ ኢኒሼቲቭ አባል ሀገርነት ሙሉ ለሙሉ ለመመለስ ጊዜ እንዲሰጣት ጠይቃለች፡፡

የኢንቴቤ ስምምነት በመባል የሚታወቀው የትብብር ስምምነት ማዕቀፉ ይፋ ከሆነበት 2010 ጀምሮ ግብፅ በናይል ተፋሰስ ኢኒሼቲቭ አልተሳተፈችም።

የትብብር ስምምነት ማዕቀፉ በስድስት የዓባይ ተፋሰስ ሀገራት መፈረሙ ይታወቃል።