Get real time updates directly on you device, subscribe now.
ኢትዮጵያ ከጀርመን ጋር ያላትን ዘርፈ ብዙ ትብብር የበለጠ ለማሳደግ እንደምትሰራ ምክትል ጠቅላይ ሚንስትር ደመቀ መኮንን ገለፀዋል።
ምክትል ጠቅላይ ሚኒስትሩ የጀርመን ኢኮኖሚ ትብብር ልማት ሚንስትሩን ዶክተር ጋረድ ሙሉርን ዛሬ በጽሕፈት ቤታቸው ባነጋገሩበት ወቅት፥ ኢትዮጵያ ከጀርመን ጋር በቴክኒክና ሙያ፣ በግብርና፣ በንግድና ኢንቨስትመንት እንዲሁም ሌሎች የትብብር መስኮች ያላቸውን ግንኙነት የበለጠ ለማሳደግ ከጀርመን ጋር ትሰራለች ብለዋል።
የጀርመኑ የኢኮኖሚ ትብብርና ልማት ሚንስትር ዶ/ር ጋርድ ሙለር በበኩላቸው ሀገራቸው በተለያዩ የልማትና የኢንቨስትመንት ዘርፎች ኢትዮጵያን መደገፍ እንደምትፈልግ ተናግረዋል።
የግብርናና ቴክኒክና ሙያ ትምህርትና ስልጠና ዘርፍ እንቅስቃሴ ለመደገፍ የጀርመን ባለሃብቶች በኢትዮጵያ መዋዕለ-ነዋያቸውን በስራ ላይ እንዲያውሉ እናደርጋለን ነው ያሉት ሚኒስትሩ።
በኢትዮጵያ በአንዳንድ አካባቢዎች የተከሰተው ድርቅ በሰውና በእንስሳት ላይ ጉዳት እንዳያደርስ የኢትዮጵያ መንግስት እያደረገ ያለውን ጥረት አድንቀው ጀርመን የበኩሏን አስተዋፅኦ ለማድረግ ዝግጁ መሆኗን ገልፀዋል።
የኢትዮጵያ መንግስት የተሻለ የኢኮኖሚ እድገት ለማምጣትና ማህበራዊ ፍትህን ለማስፈን እያደረገ ያለውን ጥረት የጀርመን ልኡክ አድንቋል።
የኢትዮጵያ እና የጀርመን ከግማሽ ክፍለ ዘመን በላይ ያስቆጠረውን የሁለትዮሽ ግንኙነታቸውን በማህበራዊ፣ ኢኮኖሚያዊና ሌሎች የትብብር መስኮች ወደ ላቀ ደረጃ በማሸጋገር ላይ ናቸው። ምንጭ፡-ኢዜአ
