Get real time updates directly on you device, subscribe now.
የውጭ ጉዳይ ሚኒስትሩ ዶክተር ወርቅነህ ገበየሁ በ4ኛው የኢትዮ አልጀሪያ የሚኒስትሮች የጋራ ኮሚሽን ስብሰባ ለመካፈል አልጀርስ ገብተዋል።
ሚኒስትሩ አልጀርስ ሲገቡ በአልጀሪያ አቻቸው ራምቴን ላማምራ አቀባበል ተደርጎላቸዋል።
4ኛው የኢትዮ አልጀርስ የሚኒስትሮች የጋራ ኮሚሽን ስብሰባ የሁለቱን ሀገራት የጠበቀ ግንኙነት የበለጠ ያጎለብታል ተብሎ ይጠበቃል።
ሀገራቱ የሁለትዮሽ ትብብራቸውን በፖለቲካዊ፣ ኢኮኖሚያዊ እና ማህበራዊ ዘርፎች ለማስፋትም ይመክሩበታል።
በስብሰባው ማጠናቀቂያ ላይ የተለያዩ ስምምነቶች እና የመግባቢያ ሰነዶችም እንደሚፈረሙ ነው የሚጠበቀው።
ከሚኒስትሮች የጋራ ኮሚሽን ስብሰባው ጎን ለጎንም የኢትዮጵያ እና አልጀሪያ ባለሙያዎች የሁለቱ ሀገራት የትብብር ማዕቀፎችን የሚገመግሙ ሲሆን፥ የትብብር መስኮቹን ለማስፋት በሚያስችሉ ጉዳዮችም ላይ ይመክራሉ።
ኢትዮጵያ እና አልጀሪያ ለረጅም አመታት የዘለቀ ግንኙነት አላቸው።
ሁለቱ ሀገራት እንደ አውሮፓውያኑ አቆጣጠር በ1960ዎቹ መግቢያ ዲፕሎማሲያዊ ግንኙነታቸውን መጀመራቸው ይታወሳል።
አልጀሪያ በ1976 በአዲስ አበባ ኤምባሲዋን የከፈተች ሲሆን፥ ኢትዮጵያም በ2016 ኤምባሲዋን በአልጀርስ መክፈቷን የውጭ ጉዳይ ሚኒስቴር አስታውሷል።
