የዩናይትድ ስቴትስ ግዙፉ ያም ብራንድስ አለም አቀፍ ኩባንያ እና የኢትዮጵያው በላይ አብ ፉድስ እና ፍራንቻይዝ ኃላፊነቱ የተወሰነ ኩባንያ በኢትዮጵያ 10 የፒዛ ምግቦች የሚሸጡባቸው ሬስቶራንቶች ለመክፈት ስምምነት ተፈራረሙ፡፡
የመጀመሪዎቹ ሶስቱ በስድስት ወራት ስራ የሚጀምሩ መሆናቸውን እና በሶስት አመታት ጊዜ ውስጥ 10 የፒዛ ቤቶች እንደሚከፈቱ የፕሮጀክቱ ባለአክስዮን ሚካኤል ገብሩ ለሬውተርስ ተናግረዋል።
መቀመጫውን ኬንታኪ ያደረገው ያም በአፍሪካ ከ1 ሺህ በላይ የፒዛ ምግቦች ሬስቶራንቶች ደረጃውን ጠብቀው በመለያው የሚሸጡ ሲሆን፥ ኩባንያው በአህጉሪቱ 188 ፍቃድ ያላቸው ቅርንጫፎች እንዳሉት ተዘግቧል፡፡
ያም ብራንድስ በአሜሪካ እና በመላው አለም ፈጣን ምግቦችን በማቅረብ የሚታወቅ ሲሆን፥ 42 ሺህ 692 ሬስቶራንቶች የፈጣን ምግብ ምርቶችን በኩባንያው ደረጃ እና መለያ የሚሸጡ መሆናቸውን መረጃዎች ያሳያሉ፡፡
ከተጠቀሰው ቁጥር ውስጥ 8 ሺህ 927 የሚሆኑት በኩባንያው በቀጥታ በባለቤትነት የሚተዳደሩ ናቸው።
ምንጭ፦ ሬውተርስ