ኢትዮጵያና ካናዳ የንግድ ግንኙነታቸውን ለማጠናከር ተስማሙ

ኢትዮጵያና ካናዳ በመካከላቸው ያለውን የንግድ ግንኙነት ለማጠናከር ተስማሙ።

ጠቅላይ ሚኒስትር ኃይለማሪያም ደሳለኝ በካናዳ ፓርላማ የውጭ ጉዳዮች ተጠሪ ሚስተር ኦማር አልግሃብራ የተመራ ልኡካን ቡድንን በቢሯቸው ተቀብለው አነጋግረዋል።

ውይይቱን የተከታተሉት በኢትዮጵያ የካናዳ አምባሳደር ፊሊፕ ቤከር እንደገለጹት፥ ሃገራቱ በንግድና ኢንቨስትመንት ያላቸውን ግንኙነት ለማጠናከር ተስማምተዋል።

አምባሳደሩ አያይዘውም ካናዳ ለኢትዮጵያ የምታደርገውን ድጋፍ አጠናክራ እንደምትቀጥል የውጭ ጉዳዮች ተጠሪው መናገራቸውንም ገልጸዋል።

ኢትዮጵያ በካናዳ የልማት መርሃ ግብር ድጋፍ ከሚደረግላቸው ሃገሮች አንዷ መሆኗን ያስታወሱት አምባሳደሩ፥ የልዑካን ቡድኑ መሪ ድጋፉ ተጠናክሮ እንደሚቀጥል ለጠቅላይ ሚኒስትሩ መናገራቸውን አብራርተዋል።

ሁለቱ ሃገራት ከልማት ትብብር በተጨማሪ የፖለቲካዊና ዲፕሎማሲያዊ ግንኙነታቸውን በሚያጠናከሩባቸው ጉዳዮች ዙሪያም ተወያይተዋል።

ሃገራቱ በፌዴራሊዝም ስርዓት የሚመሩ ከመሆናቸው ጋር ተያይዞ በዘርፉ ልምድ የሚለዋወጡበትን ሁኔታዎች ለማጠናከር መክረዋል።

እንደ ኢዜአ ዘገባ ካናዳ በየዓመቱ ለኢትዮጵያ ልማት የሚውል ከአንድ መቶ ሚሊየን ዶላር በላይ ድጋፍ ታደርጋለች።