Get real time updates directly on you device, subscribe now.
የፌዴራሉ ከፍተኛ ፍርድ ቤት 15ኛ ወንጀል ችሎት በእነ አቶ መላኩ ፈንታ የክስ መዝገብ ክስ የተመሰረተባቸው ባለሀብቱ አቶ ስማቸው ከበደ ላይ የስድስት አመት ጽኑ እስራት ቅጣት አስተላለፈ።
ችሎቱ በግለሰቡ ቅጣቱን የጣለው ከ1998 እስከ 2004 ዓ.ም የፍሬ ግብርና ተጨማሪ እሴት ታክስ ከ15 ሚሊዮን ስምንት መቶ ሺህ ብር በላይ በወቅቱ አሳውቀው ባለመክፈላቸው የፌዴራል ስነ ምግባርና ጸረ ሙስና ኮሚሽን የመሰረተባቸውን ሁለት ክሶች ተከትሎ ነው።
ችሎቱ ቀደም ሲል በነዚህ ሁለት ክሶች ላይ ያስተላለፈባቸውን ፍርድ ተከትሎ አቶ ስማቸው ከበደን በስድስት አመት ጽኑ እስራት እንዲሁም ይህ ንግድ የሚንቀሳቀስበት ድርጅታቸው ዲ ኤች ሴሜክስ ላይ የአንድ መቶ ሺህ ብር ቅጣት ጥሏል።
የፌዴራሉ ከፍተኛ ፍርድ ቤት 15ኛ የወንጀል ችሎት በግለሰቡ ላይ የ16 አመት የቅጣት መነሻ ቢይዝም አቶ ስማቸው ያቀረቧቸው አምስት የቅጣት ማቅለያዎች ውሳኔው ስድስት አመት እንዲሆን አድርጎታል።
ችሎቱ በግለሰቡ ላይ ያስተላለፈው ቅጣት እጃቸው ከተያዘበት ከ2005 ዓ.ም ጀምሮ የሚታሰብ እንዲሆንም ትዕዛዝ አስተላልፏል።
በቀድሞው የኢትዮጵያ ገቢዎችና ጉምሩክ ባለስልጣን ዋና ዳይሬክተር የነበሩት አቶ መላኩ ፈንታና ምክትላቸው አቶ ገብረዋህድ ወልደጊዮርጊስን ጨምሮ በሶስት መዝገቦች እየታዩ ካሉ ክሶች፣ ችሎቱ 141354 እየተባለ በሚጠራው የክስ መዝገብ ላይ የተከሳሽ መከላከያ ምስክሮችን እስከሚቀጥለው ሁለት ሳምንት ያጠናቅቃል ተብሎ ይጠበቃል።
141352 እና 56 እየተባሉ የሚጠሩ ሁለት የክስ መዝገቦችን ከአዲሱ የበጀት አመት ጀምሮ መከታተል እንደሚጀምር ከፍርድ ቤቱ መርሀ ግብር ለማወቅ ተችሏል።
ሪፖርተር:-ጥላሁን ካሳ
