በኢትዮጵያ የሽብር ድርጊት ለመፈፀም ከኤርትራ ስልጠና ወስደው የገቡ ግለሰቦች በእስራት ተቀጡ

በኢትዮጵያ የሽብር ድርጊት ለመፈፀም ከኤርትራ ስልጠና ወስደው የገቡ ግለሰቦች በእስራት ተቀጡ

በኤርትራ ሀረና ተብሎ በሚጠራ ስፋራ ግንቦት 7 የተባለውን የሽብር ድርጅት በመቀላቀልና ወታደራዊ ስልጠና በመውሰድ በኢትዮጵያ የሽብር ድርጊት ሲፈጽሙ የተያዙት አምስት ግለሰቦች ከ14 እስከ 15 ዓመት በሚደርስ ጽኑ እስራት ተቀጡ።

ተከሳሾቹ ዮሃንስ መንግስቴ፣ ጸጋዬ ዘለቀ፣ ጋሻው ሙንዬ፣ ማንአስቦት ብርሀኑ እና አስማረ ግለጥ የተባሉ ናቸው።

ግለሰቦቹ ራሱን ግንቦት 7 ብሎ በሚጠራው የሽብር ድርጅት ውስጥ በመሳተፍ በኤርትራ ስልጠና በመውሰድና የጦር መሳሪያዎችን፣ ጥይቶችንና ቦምቦችን በመያዝ ለሽብር ተልእኮ ወደ ኢትዮጵያ መግባታቸውን አቃቤ ህግ ያቀረበባቸው ክስ ያስረዳል።

የከሳሽ አቃቤ ህግ የክስ መዝገብ እንደሚያስረዳው ግለሰቦቹ በሰሜን ጎንደር ዞን አርማጭሆ ወረዳ ዘመነወርቅና መተማ ወረዳ ላይ በአርሶ አደሮች ላይ ተኩስ ከፍተዋል።

በዚህም 1 ሰው ህይወቱ ሲያልፍ ሁለት ግለሰቦችን አቁስለው በቁጥጥር ስር መዋላቸውን ያስረዳል።

በዚህም መሰረት ከሳሽ አቃቤ ህግ በግለሰቦቹ ላይ በሽብር ወንጀል ክስ መስርቶባቸዋኝል።

የፌደራሉ ከፍተኛው ፍርድ ቤት ልደታ ምድብ 4ኛው የወንጀል ችሎትም ክሱ ለተከሳሾቹ እንዲደርሳቸው ካደረገ በኋላ ተነቦላቸው እንዲረዱት ተደርጓል።

ተከሳሾቹ በሰጡት የእምነት ክህደት ቃልም የወንጀል ድርጊቱን አልፈፀምንም ጥፋተኛም አይደለንም በማለት ክደው ተከራክረዋል።

ይሁን እንጂ ግለሰቦቹ የከሳሽ አቃቤ ህግን የሰውና የሰነድ ማስረጃዎች መከላከል ባለመቻላቸው ጥፋተኛ ተብለዋል።

በዚህም መሰረት 2ኛ ተከሳሽ ጸጋዬ ዘለቀ ለፍርድ ቤቱ ሁለት የቅጣት ማቅለያ በማቅረቡ በ14ት ዓመት ፅኑ እስራት ሲቀጣ ሌሎቹ አራቱ ተከሳሾች በ15 ዓመት ጽኑ እስራት እንዲቀጡ ሲል ፍርድ ቤቱ ወስኗል።

በሰለሞን ጥበበስላሴ