የአፍሪካ ቀንድን ጆኦፖለቲካ የቀየረው ጉብኝት

ዶ/ር ወርቅነህ ገበየሁ ዛሬ በጽ/ቤታቸው በሰጡት መግለጫ ክቡር ዶ/ር አብይ በኤርትራ ባደረጉት ጉብኝት ላይ ያለ ሶስተኛ አካል ጣልቃ ገብነት የተደረሰው መግባባት እና ስምምነት የአፍሪካ ቀንድን ጂኦፖለቲካ የቀየረ ነው ብለዋል፡፡

መሪዎቹ የጥላቻ የፖለቲካና አሉታዊ የዲፕሎማሲ ቅስቀሳ ላለማድረግ፣ ዲፕሎማሲያዊ ግንኙነት ለመቀጠል የኢትዮጵያ አየር መንገድ በረራ እንዲጀምርና በወደብ አጠቃቀም ላይ በጋር ለመስራት ተስማምተዋል፡፡

ለ20 ዓመታት አይደለም ለአንድ ቀን ሰላም ማጣት ከባድ ነው ያሉት ዶ/ር ወርቅነህ ሰላም እንዲሆን የሁለቱ አገሮች ህዝቦች፣ የሃይማኖት መሪዎችና የአገር ሽማግሌዎች ትልቅ ጥረት ማድረጋቸውን ተናግረዋል፡፡

የውዝግቡ መፍታት ፋይዳው ከሁለቱ አገሮች አልፎ ለቀጠናው ሰላም ወሳኝ ነው ያሉት የውጭ ጉዳይ ሚኒስትሩ በተለይም ክቡር ዶ/ር አብይ አህመድ እና የኤርትራው መሪ ፕሬዝዳንት ኢሳያስ አፈወርቂ የድንበር ውዝግቡ በፍቅር እንዲፈታ ላደረጉት ጥረት ዕውቅና እና የዓለም አቀፍ የሰላም ሽልማት ሊሰጣቸው ይገባል ሲሉ ገልፀዋል፡፡

አስመራ በገቡበት ወቅት በኤርትራውያን ዘንድ ያለምንም ቀስቃሽ የነበረውን ከልብ የመነጨ አቀባበል እና የመናፈቅ ስሜት ልብ የሚነካ መሆኑንም የውጭ ጉዳይ ሚኒስትር ዶ/ር ወርቅነህ ጠቅሰዋል፡፡

ኢትዮጵያና ኤርትራ በአፍሪካ ቀንድ ልማት እና መረጋጋት ከሌሎች የአከባቢው አገሮች ጋር ተቀናጅተው ለመስራት እንዲሁም፣ ኢጋድን ለማጠናከር መሪዎቹ ተስማምተዋል፡፡

ስምምነቶቹን ወደ ዝርዝር ተግባር ለማድረግ በውጭ ጉዳይ ሚኒስትሮች ደረጃ የሚመራ ኮምሽን ለማቋቋምም ከመግባባት ተደርሷል፡፡

በክብር ዶ/ር አብይ የተመራ ልዑካን በአስመራ ያደረገውን ታሪካዊ ጉብኝት አጠናቆ ዛሬ እኩለቀን አዲስ አበባ ገብቷል፡፡